الفرق بين Alpha و Beta وDemo و Trial

لما بتنزل نسخة من برامج أو ألعاب جديد بتلاقي اصدارات دائما جنب اسمها
زي مثلا Alpha / Beta / Demo / Trial ~ ايه بئة دوول ؟؟
لما بينزل برنامج/لعبة مبتنزلش السوق بشكل رسمي مرة واحدة كدة علشان دائما بيبئي فيه غلطات ومشاكل في الكودنج نتيجة ان أكثر من شخص بيبئي شغال في نفس المشروع او تعارض أفكار كانت المفروض تتنفذ ومتنفذتش مع اصدار سابق للـ product ده

- النسخة #Alpha :
نسخة مخرمة من جميع الاتجاهات واوعي تشتغل بيها كنسخة أساسية، بتبئي موجهة بشكل أساسي للمطورين علشان يقولوا رأيهم فيها ويتعدل الغلطات اللي فيها - ممكن ينزل منها أكثر من نسخة بس بيبئي كحد أقصي نسختين والا بيبئي المنتج ده فاشل في نظر المطورين
(بالظبط زي عربية لسة بتظبط ماتورها ولسة من برة العربية مسكرة ومتدشدشة)

- النسخة #Beta :
النسخة المعدلة من نسخة ألفا، بتنزل بكل التصليحات اللي اتقالت عليها بضمها وتعديلات جديدة كمان وممكن ينزل منها أكثر من نسخة لغاية ما المنتج الكود المكتوب بيه يكون استقر ومحترم وينفع ينزل للناس
(أكن نفس العربية اتسمكرت واتدهنت بس عايزة تتلمع علشان تتعرض)

- النسخة الـ #Demo :
نسخة غير مكتملة المزايا من الـ product بتنزل علشان تخلي الـ user يجرب المنتج ده علي الحقيقة بدون ما يدفع فلوس فيه بس بيكون ليها limits في مزاياها زي ألعاب الكورة مثلا بيديك ماتش واحد لمدة ربع ساعة عربون
(نظام خد فكرة واشتري بكرة)

- النسخة #Trial :
نسخة مبدئية من الـ product بتنزل علشان الناس تجربها بتكون ليها وقت معين وبعدها النسخة تتقفل ومينفعش تشتغل عليها الا لما تشتريها وممكن تكون Demo و Trial في نفس الوقت

* اوعي تستخدم الاصدارات الـ Alpha كاصدار رئيسي لنفسك ﻷنه بيكون مليان ثغرات ومشاكل كثيرة جدا هتأدي عاجلا أو آجلا ان يحصل معاك مشاكل كثيرة
** النسخ الـ Beta متلجألهاش الا لو مزنوق في feature جديدة نزلت وعايز تستغلها

المصدر : iTawy