اتكلمنا فى تدوينة قبل كده عن الأسرة بعنوان " اعرف اكتر عنChalleng " ممكن ترجعلها


# ليه انضم للفريق معاكو ؟
وجودك كعضو من الفريق هيكسبك مهارات كتيير يمكن تكون مش واخد بالك منها زى ايه :
1- هتحضر كل السيشنات والورش اللى هنعملها .
2- كونك هتشارك فى السيشنات والورش يبقى هتلشتغل عملى بايدك وده دافع ليك , كلنا نفسنا نبدأ بس الكسل مسيطر علينا .
3- هتستفاد بوقتك اللى ممكن يكون ضايع فى الكلية ونفسك تستغله .
4- هيبقى عندك الفرصة انك تساعد غيرك وتشترك فى عمل تطوعى "زكاة العمل نشره" .
5- هتشتغل فى بيئة عمل جماعى كفريق عمل هيديلك مهارات القيادة والشغل تحت ضغط وتحمل المسئولية .
6- الشخص بيتأثر بالبيئة المحيطة بيه , يعنى لو انت فى بيئة كلها حماس وتشجيع هيساعدك انك تتطلع احسن ماعندك
7- هتتعلم فن الحوار مع الاخرين والرآى والرآى الاخر .
8- هتقدر تعبر عن نفسك وتبقى شخص اجتماعى لو كنت شخص منعزل .
9- هتتعلم كمان حسن التصرف مع المواقف الطارئة .

10- لو هتشرح هتكتسب مهارات التواصل مع الطلبة وبعدها تقدر تبقى انستركتور فى سنتر مثلا .

11- لو اكتسبت مهارات اثناء التيرم هنوفرلك شغل تقدر تعمله وتكسب منه فلوس وده هيديلك خبرة تساعدك مستقبلا .

12- لما بتدخل فى انترفيو ويعرف انك كنت بتشارك فى انشطة تطوعية هيحترمك .

# طيب ايه رؤيتكم للسنة اللى جايه ؟

هنكمل اللى بدأناه السنة اللى فاتت من سيشنات وورش وكورسات وتوزيع ورق للمحاضرات وعمل سيشنات للمراجعة وتطوير للكلية .

هدفنا السنة اللى جايه

اننا ندخل مجالات جديدة للسيشنات زى ريادة الاعمال والعمل الحر والبيانات الضخمة ونشجع الطلبة اكتر انها تشتغل وتطور من نفسها ونحاول نوفرلهم تدريبات مناسبة ومسابقات لتحفيزيهم ونوصل لباقى الجامعة ونعرفهم بكليتنا .

# هل مشاركتى فى التيم هتضيع من وقتى ؟

بالعكس تماما , مشاركتك فى التيم هيا استغلال لوقتك الضايع , يعنى لو عندك جزء من وقتك تقدر تتبرع بيه وتتطوع معانا يبقى شىء جميل منك .

# ممكن اطوع معاكم فى ايه ؟

عندنا اكتر من حاجة ممكن تطوع معانا بيها انت بتختار حاجة واحدة بس منها :

- فريق الميديا : وده هدفه الدعاية للسيشنات والانشطة والتواصل مع الطلبة .

- فريق التنظيم : هدفه التنظيم اثناء السيشنات للقاعات .

- فريق العلمى : وده اللى ممكن يشرح او يساعد فى التطبيق العملى اثناء السيشنات 

- فريق التصوير : وده هدفه انه يصور اثناء السيشنات ويؤثق الانشطة .

تابع القراءه »

# ليه Challenge ؟
- هو تحدى اننا هنقدر نطور من نفسنا ونطور من الكلية ونغيريها للاحسن

# احنا مين ؟
- مجموعة من طلبة الكلية من دفعات مختلفة بنحاول نساهم فى تطوير الكلية

# ليه عملنا الأسرة ؟
- زمان واحنا فى سنه اولى وتانية كنا تايهين ومش فاهمين حاجة ولا كنا عارفين نبدأ الطريق منين , ناس ساعدتنا وناس اتخلت عننا .. فقررنا ننشىء الأسرة ككيان رسمى داخل الكلية نقدر من خلاله نساعد الطلبة بكل اللى نقدر عليه وميكونوش فى نفس الحيرة اللى كنا فيها .

# طيب ايه الانشطة اللى هتقدموها ؟
- فى الحقيقة احنا عندنا افكار كتيير وانشطة اكتر , واكيد مش هنقدر ننفذ اى نشاط منهم الا بمساعدة طلبة الاسرة .

# ممكن تدينا تفاصيل اكتر عن انشطة الأسرة ؟

على الجانب العلمى :-
- ورق المحاضرات والسكاشن والشيتات الخاصة بكل الدفعات فى المواد الصعبة .
- امتحانات التيرم ونحاول نجيب الحلول بتاعتها .
- عمل مراجعات فى المواد الصعبة بالاتفاق مع معيدين المواد .
- هيكون فيه اكتر من Round هنتكلم فيه عن موضوع معين زى مثلا ازاى ابدا فى البرمجة , العمل الحر , ازاى استغل وسائل التواصل الاجتماعى بشكل صحيح , ازاى ابنى براند ليا على الفيس بوك , لينكدان , تكنولوجى جديدة وغيرها .
- هيكون فيه اكتر من Workshop ودى هتكون ايام متتالية هنطبق فيها حاجة معينة زى مثلا ورشة عمل المدونات بلوجر أو وردبريس , ازاى ابنى موقع بالكامل , ازاى نعمل برنامج قابل للبيع فى السوق , ازاى اعمل موبايل ابليكشين .
- هيكون فيه اكتر من كورس كامل على مدار التيرم زى تصميم مواقع , قواعد البيانات وغيرها .
- هيكون فيه Hard Disk عليه كل الكورسات والبرامج اللى ممكن نستفاد منها او نتعلم منها self-study

على الجانب الترفيهى :-
- رحلة او اتنين على مدار التيرم
- مسابقات

على الجانب الرياضى
- دورة قدم خماسى
- دورة شطرنج
- دورة بينج

على الجانب الاجتماعى
- حفلة يوم اليتيم

# جانب من الانشطة اللى عملتوها السنه اللى فاتت ؟

- وفرنا ورق للمحاضرات والمراجعات لدفعة اولى وتانية وتالته .

- عرفنا دفعة اولى بالكلية وقدرنا نوزع ماتريال لاكبر عدد من الطلبة .

- وفرنا عدد من السيشنات الكتييرة عشان نعرف الطلبة بمجالات الكلية وسوق العمل وكنا على وشك نبدأ فى ورش عمل تطبيقية لولا الوقت .

- وفرنا سيشنات مراجعات لمواد الكلية اللى اتفقت الطلبة على صعوبتها .

- قدرنا نبنى مدونة للكلية ننزل فيها الاخبار ومقالات ومواضيع مفيدة للطلبة .

- دشنا صفحة Challenge عشان ننشر عليها كل جديد فى الكلية ونفيد بيها الطلبة .

- دشنا قناتنا على اليوتيوب وبدأنا فى رفع عدد من الكورسات البسيطة ومستمرين . 

- الصور بتلخص جزء من السيشنات اللى قدرنا نعملها ونوفرها السنه اللى فاتت .

ملحوظة : ماخدناش ولا جنيه دعم من الكلية عشان ننفذ اى حاجة كلها بالجهود الذاتية .

مكملين ^_^

تابع القراءه »